《ꑓꁴꉂꏣ》
ꁱꊿ：ꏾꐚꈬꁇ
ꐥꐨꈎꄜꐊ
ꉌꃀꑓꁳꐊ
ꑓꁴꅏꅉꃅꇀꌋꋧꃅꑟ
ꐥꐨꇬꑓꁴꄩꊰꋺꄷ
ꑓꁴꆹꉌꃀꅿꎭꐨꉬ
ꇬꀧꀱꑭꁘꐊ
ꑭꁘꄔꐨꄅꍅꀕ
ꑓꁴꋍꄩꊰꇁꑭꐨꇢꊭꌸ
ꃰꊿꉌꃀꉪꅈꎴ
ꀃ-----ꀂ
ꋧꃅꉩꅉꇢꅈꑟ
ꐥꐨꈌꌠꀉꄂꄅꍄꀕ
ꉌꃀꉩꃙꀉꄂꄅꍄꀕ
ꀄꂼꀕꇬꑌꈌꂙꃨꇽꌠꂼ
ꀀꐙꇁꄮꑌꈌꀋꇁꌦ
ꁦꄩꂙꃨꑌꀋꃨꅊꇈ
ꀄꂼꑭꐨꀉꄂꁧꄩꁮ
ꈍꄮꑲꆀꂙꃨꀕꀋ？
ꑓꁴꂙꃨꇁꉚꊨꏦꑓꁳꅐꑴꄷ
ꉡꆹꊨꏦꑓꁴꅐꀋꏾꐛꅹ
ꑌꈌꂙꃨꐊꄉꒊꌊꀕ
ꎭꐨꄜꌋꂙꃨꑌꀋꇯ
ꌒꐨꄜꌋꃰꊿꑌꀋꇯ
ꊨꏦꀱꊨꏦꏭꉌꌒꊐ
ꆎꆹꈍꄮꑌꂙꃨꌡꃅꃨꌡꉬ！
ꃰꊿꐥꐨꆹꈍꑌꈎꐥꀋ
ꑓꁴꅐꅉꃅꋧꃅꑞꌠꈍꑌꐥ？
ꑓꁴꅐꅉꃅꋧꃅꐞꁧꌠꈍꑌꐥ？
ꁮꅉꀉꄂꁡꇤꄉꌙꈃꀕ
ꁡꇤꆹꋧꃅꄉꆈꋪꀕ
ꈌꃮꂿꃙꀉꄂꄏꌬꀕ
ꁡꇤꑭꐨꐥꅉꑍꅈꑟ？
ꀋꄸꄷ……
ꁡꇤꈌꃮꂿꃚꀋꈧꆏ
ꉆꐥꃅꀱꁡꇤꄉꁮꅉꌧꇀ
ꆎꑴꌠꎺꄉꑓꁴꆹꄡꅐ
ꇵꊫꋏꄉꋧꃅꏭꎭꅇꄜ
ꆎꆹꐥꐨꇬꄉꑓꁳꈍꑌꊰ？
ꋧꃅꌕꁱꀕꌕꋒꀕ
ꃆꏂꊂꑌꈍꃅꐚꁦꂯ
ꈍꄮꑌꑓꁳꄩꅐꌋꋧꃅꐞꁦꄡꑞ！
